我的同事

今日我清晨四點幾起身, 就是要準備一件大事 – 同事到訪

我懶得執屋, 一直推到最後一刻, 唯有訓少啲, 最緊要仲應承準備中式食品, 以我現時功力, 我諗最簡單就係放孖臘腸同蝦乾落煲蕃茄薯仔湯, 但又好似唔太可行, 最後就決定做上次我有份幫手嘅包餃子. 我預早一日買了餃子皮及大白菜. 執返整齊間屋, 已經六點幾, 開始包餃, 一路包, 一路好心急, 擔心趕唔切返工, 由於時間唔夠, 我只可以為每人準備四至五隻餃, 好彩我只答應做頭盤, 包出來嘅外觀都算合格, 我就立即包好保鮮紙放入雪櫃, 然後匆匆返工.

放工後, 先各自歸家, 再在超市集合, 四個大男人去shopping, 因我講明我屋企只有鹽, 糖, 油等物料, 所以佢地就大肆掃貨, 薯仔, 菜, 牛油, 啤酒, 紅酒, 羊扒.......最後終於到達我家, 在廚房一放低所有物資, 各人第一件事就係開啤酒飲, 傾左一陣, 佢地突然送了一份神秘禮物俾我, 一打開個盒, 原來係好多支每日喺公司飲嘅朱古力奶, 佢地話在丹麥一定要培養飲Cocio嘅習慣, 身體健康啲.

攪笑完一輪, 佢地又攞左另一份禮物出黎, 又打開, 今次係一個好精美嘅開瓶器, 在丹麥朋友都無個, 收到一份禮物, 真係好感動, 之後用佢只花二秒就開左支紅酒, 成個過程四個人都在廚房, 好彩有足夠空間.

晚餐就由我準備嘅餃子開始, 正當我由雪櫃攞出黎而將要放佢地落湯嘅時候, 竟發現佢地就好似示威人士一樣, 一個緊扣住一個, 點分都分唔開, 死, 點算! 大家都等住我嘅頭盤, 唯有盡力將佢地分開, 三分一都穿左, 好唔開心, 只有將完好的餃都給同事, 總算過關.

主菜就由我阿頭煎羊扒加焗薯條, 真係好好味!