今日星期六, 做左兩件事, 第一係剪左個髮, 第二係買左一對我從來無買過嘅鞋, 一對超級專業嘅跑鞋. 事原公司每年都會組隊跑馬拉松, 五人一隊, 每人跑五公里, 同事叫我參加, 我就話我從來都無跑步, 唔掂, 但佢話志在參與, 無問題, 我諗我係新人, 都應該投入下呢啲集體活動, 增加歸屬感, 所以都應承左.
但係真係好擔心會包大艇, 因為丹麥除左周街都有人踩單車之外, 就係由早到晚都可以見到好多人跑步, 好健康, 唔想影衰中國人, 唔想做東亞病夫, 所要我下定決心, 要比其它同事早啲為九月嘅比賽操練, 我信只要比人早啲準備, 比人勤力啲, 我一定唔會係時間最慢果個, 我有信心, 因為我地有劉翔, 亦因為有佢型爆嘅一句:
"誰說黃皮膚不能跑在黑人前面? 我就跑給他們看!!!"
所以今日就行左第一步, 同事推介下, 去左一間好PRO嘅SHOP, 有專業Sales同我喺跑步機上做分析, 因應個人跑姿及唔同需要, 作出跑鞋嘅推介, 當然, 付出嘅亦係一個好PRO嘅價錢, 埋單丹麥錢 kr1600, 計一計, 即係要成港幣二千七, 真係攞命!
由於尋日係公眾假期, 所以星期四上完丹麥文就成班同學一齊去左飲野, 都係大家識左之後第一次, 都幾好笑, 全部十幾個人就好似聯合國部隊咁, 當中有中國, 印度, 波蘭, 保加利亞, 菲律賓, 加拿大, 最攪笑係丹麥sir都有去. 大家飲左杯啤酒, 就梗係無平時喺課室咁拘謹啦, 都係離唔開傾下講下自己嘅古仔, 點解黎到呢個地方, 可能大家喺丹麥都係無乜好做, 所以即場已經有人提議星期六晚要再飲一次, 反應熱烈, 而家係八點, 個太陽仲未想落山, 飲酒梗係夜晚飲嘛, 所以陣間十點先出門口.
最後, 想提一提各位留言嘅好朋友, 可以唔使用Anonymous留言, 而係用Name/URL, 直接打你個名, 唔使入URL都可以.
Choose an identity:
Google/Blogger
OpenID
Name/URL
Name
URL (optional)
Anonymous
你而家可以即刻試下啦, 哈哈!
10 comments:
五公里咋喎.... 女仔半個鐘點都跑完啦，唔駛買咁pro既鞋下化(i mean個價錢好pro,對鞋pro唔pro我就唔識分)? 哈哈.... 不過練習就真係要.
條腰未好,又去跑步?小心啲喎．
跑在白人前面”給我們看”，你得嘅．唔該哂＠＠
嘩!! $2700,你d同事真係好介紹.
你試跑過未呀!! 可能著住呢對鞋,會飛tim架. 哈哈:P
ANYWAY, 你要小心d,如果再整親就煩喇!
haha..你應該飲Red Bull嘛.. 佢會送你一對翼.. 你咪唔使擔心囉. XDDDDDDDDDDD
如果你早D講點樣留comment,我吾使比register 左既Google 玩死,等我個感性comment無鬼左(睇完你同Cherry去完柏林篇日誌後)
跑馬拉松,勁!希望你加油!最緊要條腰無事先.
見你讀丹麥文咁勤力,睇來我都要"的"起心肝學我家鄉語言"日文" 了.
只要有恆心, 你會一定 Number One :))
不過要小心啲條腰呀 !!
Manfie
好! 見你咁有決心, 點首歌你聽! :D
http://tv.mofile.com/8S5ME8ST/
加油ay,我一定支持你架我睇好你架,你唔差得過d丹麥人
傑仔, 你咁有心. 一定唔會係包大尾果個. You Can Work That Out!
傑仔你咁有心咁早準備, 一定唔會係包大尾果個啦! 支持你! You Can Work That Out!!!
Post a Comment