今日, 同平日好唔同, 今日, 就只有二十三個小時, 突然在生命中失去左一個鐘頭, 有啲唔習慣, 因為係夏令時間嘅開始, 要全人手親自將全屋嘅鐘同手錶較快一個鐘頭, 亦即提醒所有人冰冷嘅冬天快將過去, 日照時間會越來越長, 令人期待嘅夏天快要來臨.
Cherry今日已返到香港, 聽日返工, 由於希斯路機場嘅混亂, 英航機都要取消, 改坐國泰, 比原定時間都只係遲左三個鐘.
過去九日, 我地就用左四日復活節假期去柏林, 五日留喺丹麥, 德國之旅都唔錯, 可惜天氣一般, 時雪時雨.
重頭戲就梗係一到柏林圍牆 Berlin Wall, 由一九六一至一九八九年, 圍牆標誌住德國嘅分裂, 這堵厚磚牆曾將日耳曼民族一分為二, 無數東德人為尋找自由, 嘗試攀越圍牆而被殺害. 一截柏林圍牆殘骸, 現搖身一變成為一件藝術品, 由一百一十八位藝術家在牆身上集體繪畫出色彩繽紛的圖畫, 名為東邊畫廊 East-side Gallery.
查理檢查站 Checkpoint Charlie 更是當年穿越東、西柏林的重要關卡, 守衛森嚴.
附近建成博物館展出東德人民千方百計逃離東德的景況. 圖中係展示其中藏身車中嘅展品.
住方面, 由於假期, 都好緊張, 心水 hostel 都爆滿, 最後喺網上訂左一間, 第一晚夜機到, 一入去就知係招呼超級背囊友格局, 周圍黑媽媽, 只有年青鬼仔鬼妹, Cherry面口已係medium-well, 一入房就知大鑊, 好似逃避FBI追捕個種feel, 唔使多問當時女友塊面就梗係立即 well-done埋, 唯有想辦法在網上再訂酒店, 最後成功搵到一間位置一流而又係當地朋友推介, 雖然俾多少少要Eur87一晚, 但係就住得舒服好多, 其實著草hostel都唔平, 要Eur55.
我地仲去左探Cherry嘅好友, Maggie喺香港人, 嫁左去土耳其, 生完BB, 現隨老公派註柏林, 全職做少奶奶, 佢仔仔真係超可愛.
柏林之旅最後由八個半鐘頭火車從德國轉三程返到丹麥而結束.
