又搬

For some reasons, 現又將網誌搬回雅虎, 不便之處, 敬請原諒.

http://hk.myblog.yahoo.com/ay-home

五月一日

五月一, 我都有一日假, 但就唔係勞動節, 而係耶穌升天日, 雖然係星期四, 但係公司十個有九個都會放埋星期五, 有啲丹麥公司甚至會星期五都唔開, 全公司一齊放, 真開心. 呢啲假期中間嘅工作日, 對丹麥人黎講都會當埋假期, 唔會返工, 好似聖誕一定要放到新年一樣. 每人一年已經有五個星期法定大假, 再加加埋埋紅假, 真係唔多使點做. 最好係公司無權阻礙你嘅計劃, 即係話你要幾時放就幾時放, 一次過放一個月都無問題. 如果真係有問題, 公司都會覺得係人手問題, 要加以檢討, 唔會亦唔可以將個責任放喺員工身上.

相比香港, 我地就辛苦得多, 大部份人平日要OT, 星期六又要返工, 有時要放大假老細仲會唔順超, 有啲公司仲講明大假唔準連公眾假期一齊放, 簡直無良, 嚴重侵犯人權, 我以前就係有間公司係咁, 離哂譜!

全民準時收工, 五天工作, 員工受保障, 個人及家庭生活受尊重, 而經濟又可以保持強勁增長, 好似真係幾理想, 我認為我地香港幾時做到唔緊要, 最重要係我地有無開始朝住呢個方向去做.